Presidenti rus Vladimir Putin refuzoi të diskutonte mundësinë që Izraeli dhe Shtetet e Bashkuara të vrisnin udhëheqësin suprem iranian, Ajatollah Ali Khamenei, dhe tha se populli iranian po konsolidohej rreth udhëheqjes në Teheran. Kryeministri izraelit Benjamin Netanyahu ka spekuluar hapur se sulmet ushtarake të Izraelit mund të rezultojnë në ndryshimin e regjimit në Iran, ndërsa Presidenti amerikan Donald Trump tha të martën se SHBA-të e dinin se ku "fshihej" Khamenei, por se Uashingtoni nuk do ta vriste atë "për momentin". I pyetur se cili do të ishte reagimi i tij nëse Izraeli do ta vriste Khamenei-n me ndihmën e Shteteve të Bashkuara, Putin tha: "As nuk dua ta diskutoj këtë mundësi. Nuk dua ta diskutoj". Putin tha se i kishte dëgjuar komentet për vrasjen e mundshme të Khamenei-t, por vetë ai nuk donte ta diskutonte këtë cështje.