Autoritetet ruse njoftuan të mërkurën se kanë arrestuar një shtetas nga Uzbekistani, i cili, sipas tyre, ka pranuar montimin e bombës që vrau gjeneralin rus, Igor Kirillov, në Moskë, një ditë më parë, me porosi të shërbimit të sigurisë të Ukrainës. Kirillov, shefi i Trupave për Mbrojtje Bërthamore, Biologjike dhe Kimike të Rusisë, u vra para shtëpisë së tij, bashkë me ndihmësin, pas shpërthimit të një bombe të vendosur në një skuter elektrik. Ndonëse asnjë individ apo grup nuk e ka marrë përgjegjësinë për vrasjen, një burim brenda shërbimit të inteligjencës i Ukrainës, SBU - agjenci që e ka akuzuar Kirillovin se ka qenë përgjegjës për përdorimin e armëve kimike kundër trupave ukrainase, diçka që Moska e mohon, ka thënë se shpërthimi ishte rezultat i një operacion special të SBU-së. Komiteti Hetues i Rusisë, i cili heton krime serioze, tha përmes një komunikate, të mërkurën, se i dyshuari i paidentifikuar kishte pranuar gjatë marrjes në pyetje, se kishte ardhur në Moskë, ku kishte marrë një pajisje të improvizuar shpërthyese për të kryer vrasjen. Deklarata e autoriteteve ruse nënvizon se ai kishte përshkruar se si e kishte vendosur mjetin shpërthyes në një skuter elektrik, të cilin e kishte parkuar para hyrjes së ndërtesës ku jetonte Kirillov. Hetuesit e kanë cituar atë të ketë thënë se ai kishte vendosur një kamerë monitoruese në një makinë të marrë me qira aty afër, dhe se organizatorët e vrasjes, ishin nga qyteti ukrainas i Dnipros. Ata kishin përdorur kamerën për të gjurmuar Kirillovin dhe e kishin aktivizuar bombën nga largësia, pas daljes së tij nga ndërtesa. Sipas hetuesve rusë, të dyshuarit, i lindur më 1995, i ishin ofruar 100.000 dollarë për rolin e tij në vrasjen e gjeneralit, si dhe banim në një vend evropian. Hetuesit rusë kanë thënë se janë duke identifikuar njerëz të tjerë të përfshirë në vrasje, ndërsa e përditshmja Kommersant ka raportuar se është arrestuar edhe një i dyshuar tjetër.