Përgjimet e Sky dhe Encrochat që kanë në dorë autoritetet greke mund të kenë zbardhur motivet që fshihen pas ekzekutimit me eksploziv të Aleksandër Sadikajt në qershor të vitit 2022 në Tiranë. Mediat greke zbulojnë se nga bisedat e zbardhura gjatë hetimit, është zbuluar se një nga krerët e grupeve që janë nën hetim është pikërisht Aleksandër Sadikaj. Sipas përgjimeve, dyshohet se ai, së bashku me një nga drejtuesit e organizatës kriminale kanë pasur një rol aktiv në një atentat të vitit 2021 ndaj një 32-vjecarit nga Saranda Ari Papas në Athinë. Për llogari të Sadikajt, kreu tjetër i grupit ka siguruar një armë zjarri të llojit snajper me dylbi, madje duke i dërguar edhe foto të armës në Sky. Snajperin më pas ai ua ka dorëzuar disa personave në një hotel, me qëllim që të vrisnin Ari Papën. Atentati do të kryhej nga një ballkon, i cili kishte fushëpamje nga një shesh të cilin e frekuentonte Ari Papa.