Pas njoftimit të kancelarit, Karl Nehammer, i cili njoftoi largimin nga detyra për shkak të dështimit të negociatave për krijimin e koalicionit qeverisës, presidenti i Austrisë mandatoi liderin e partisë së Lirisë, Herbert Kickl që formojë qeverinë e re. Partia e Lirsë, e cila është kundër imigracionit dhe pro Rusisë, fitoi zgjedhjet parlamentare neë Austri në muajin shtator. Por, në tetor, presidenti Van der Bellen ia dha mundësinë e parë Nehammerit për ta formuar qeverinë e re, pasi partia e Nehammerit kishte thënë se nuk do të futej në koalicion qeverisës me Partinë e Lirisë përderisa Kickl është lider i saj, ndërsa partitë e tjera nuk pranonin fare të bashkëpunonin me Partinë e Lirisë. E djathta ekstreme dhe konservatorët kanë qeverisur së bashku më parë, por në rastet e mëparshme Partia e Lirisë ishte partneri i vogël në koalicion. Së fundmi, ata drejtuan Austrinë nga viti 2017 deri në vitin 2019, në një qeveri ku Kickl shërbeu si ministër i Brendshëm. Ajo qeveri ra pas një skandali në të cilin u përfshi lideri i atëhershëm i Partisë së Lirisë. Nëse Kickl ia del ta formojë qeverinë, atëherë Austria do të udhëhiqet nga një qeveri e ekstremit të djathtë për herë të parë që nga Lufta e Dytë Botërore.