Nga fillimi i vitit deri më 17 dhjetor 2024 qeveria gjermane ka miratuar eksportimin e armatimeve në vlerë rreth 13,2 miliardë euro. Këtë e deklaroi Ministria e Ekonomisë duke u bazuar në shifrat paraprake. Në këtë mënyrë eksportet e armatimeve arrijnë një vlerë rekord duke e tejkaluar kuotën e një viti më parë. Më 2023 vlera e eksporteve të miratuara për armatimet ishte 12,2 miliardë euro. Volumi i lartë i eksportit të armatimeve vazhdon të ketë si arsye luftën në Ukrainë. Ky vend i sulmuar nga Rusia edhe sivjet ka qenë vendi kryesor ku janë dërguar eksportet me një volum 8,1 miliardë euro, që përbën kuotën e 62 përqind të të gjitha eksporteve të miratuara për armatime. "Shifrat theksojnë, që ne vazhdojmë të qendrojmë fort në krahun e Ukrainës në mbrojtjen e saj dhe kundër luftës agresive ruse", deklaron Ministria e Ekonomisë. Vlera e përgjithshme prej 13,2 miliardë eurosh konsiston në 8,1 miliardë euro për armë lufte dhe rreth 5,1 miliardë euro për pajisje të ndryshme armatimi. Eksportet e armatimeve i nënshtrohen vazhdimisht verifikimit të posaçëm nga qeveria. Për Singaporin këtë vit janë miratuar furnizime në vlerën 1,2 miliardë euro, për Algjerinë gati 559 milionë. Pasojnë SHBA me 298,5 milionë euro, Turqia me 230,9 milionë euro dhe India me 224,0 milionë euro. Qeveria nën kancelarin socialdemokrat Olaf Scholz kishte vendosur të ndiqte një kurs strikt përsa i përket miratimit të eksporteve të armatimeve. Por për mbështetjen e Ukrainës në mbrojtje ndaj Rusisë është bërë një përjashtim. "Ndihma ushtarake për Ukrainën është në interesin tonë të politikës së sigurisë", deklaroi sekretari i shtetit në Ministrinë e Ekonomisë Bernhard Kluttig. Në përgjithësi qeveria i përmbahet kursit të saj "për një politikë restriktive ndaj eksporteve të armatimeve me një nivel të lartë të standardit të verifikimit".