Pamje të pazakonshme përpara festave të fundvitit janë vërejtur këto ditë në tregjet e shumë qyteteve. Aty shihen fare pak blerës, ndonëse çmimet nuk kanë pësuar rritje, madje në disa raste ka edhe rënie. Pak më ndryshe paraqitet situata në tregjet e Tiranës, por edhe aty tregtarët ankohen për rënien e fuqisë blerëse. I ftuar në “Wake Up”, përfaqësuesi nga Shoqata e Biznesit të Vogël dhe të Mesëm, Shpëtim Agolli theksoi se kërkesa konsumatore është mjaft e ulët, edhe pse çmimet nuk janë rritur. “Çmimet nuk janë rritur në krahasim me të njëjtën periudhë të viteve të mëparshme. Kërkesa është shumë e vogël këtë vit dhe çmimet ndaj janë në atë nivel. Sot mungon kërkesa konsumatorë. Tregtarët tregojnë më pak sesa tregtonin në vitin 2019. Nga vëzhgimi që kemi bërë si shoqatë, tregtarë ankohen se ka rënë kërkesa dhe tregtojnë 30-40 për qind të vlerës analoge me vitin 2019. Sivjet e shikojmë, ashtu si ka qenë gjithë viti, në momentin që filloi kriza e pandemisë, nga marsi deri tani. Jo më larg se dje, ministrja e financave deklaroi se shtetit këtë viti do t’i mungojnë 600 milionë dollarë”, theksoi ai.