Shtëpia e Bardhë ka reaguar ekskluzivisht për Top News pas komenteve të Kryeministrit Ed Rama në formën e batutës për Presidentin Donald Trump, një shaka e bërë në praninë e Presidentit të Francës, Emanuel Macron dhe Presidentit të Azerbajxhanit, Ilham Aliyev. Gazetari Xhoi Malësia dërgoi tre pyetje për godinën më të pushtetshme të botës. E pyetur nëse komentet e Ramës janë marrë në kontekst negativ ose ndikojnë në marrëdhëniet dypalëshe, Nënsekretarja e Shtypit në Shtëpinë e Bardhë, Anna Kelly ka patur një përgjigjie krejtësisht diplomatike. “Presidenti Trump ka bërë më shumë për stabilitetin global, se sa çdo lider tjetër në botë!” Zyrtarja e lartë e komunikimit me mediat ka qenë tejet e kujdesshme duke i kujtuar Kryeministrit thjesht një fakt që Presidenti Trump e përmend shpesh në daljet e tij publike: vullnetin pozitiv për të arritur marrëveshje paqeje. Anna Kelly aktualisht shërben si Zëvendës Sekretare Shtypi në Shtëpinë e Bardhë. Ajo u emërua në ketë pozicion në janar 2025. Komentet e Ramës në prani të dy liderëve të tjerë u përshkruan si tallëse nga disa prej mediumeve më prestigjoze të botës, por ishte vetë Kryeministri i cili përgënjeshtroi duke thënë se një moment gazmor është tjetërsuar me qëllime dashakeqësie. Vetë Rama përmendi gjithashtu përpjekjet pozitive të Trump për t’u angazhuar në zgjidhjen e konflikteve.