Pasoja e pandemisë së Covid 19 po ndihen gjithmonë e më shumë në ekonominë shqiptare, ku të dhënat për ecurinë e saj po bëhen të zymta. Siç raporton Banka e Shqipërisë besimi i bizneseve dhe konsumatorëve në ekonominë shqiptare ka arritur në nivelin më të ulët në histori. Treguesi i ndjesisë ekonomike gjatë tremujorit të dytë shënoi nivelin më të ulët që prej fillimit të matjes së tij në vitin 2002. Ky tregues në përgjithësi është ulur mbi 50 %, ndërsa ka arritur përkeqësimin më të madh me treguesin e besimit në sektorin e shërbimeve me 56.6 % vetëm gjatë tremujorit të dytë të këtij viti. Mbyllja e restoranteve, bareve, lokaleve, hoteleve, apo edhe kategorive të tjera në sektorin e shërbimeve kanë shkaktuar këtë rënie të madhe besimi, por faktor është edhe rënia e kërkesës e shkaktuar nga mungesa e konsumatorëve.