Reforma e pagave në sektorin publik ka ndikuar pozitivisht në arkëtimet e buxhetit të shtetit në shtatë muajt e parë të këtij viti. Të dhënat e Ministrisë së Financave tregojnë se arkëtimet në buxhet në total kanë qenë rreth 4 miliardë euro, me një rritje prej 300 milionë eurosh me kursin e këmbimit 1 me 100. Kontribut kryesor në rritjen e arkëtimeve ka dhënë tatimi mbi të ardhurat personale dhe kontributet për sigurimet shoqërore dhe shëndetësore. Në dy zërat që reflektojnë drejtpërdrejt rritjen e nivelit të pagave arkëtimet kanë qenë rreth 140 milionë euro më shumë se sa e njëjta periudhë e vitit të kaluar. Të dhënat tregojnë se të arkëtimet nga tatimi mbi të ardhurat personale në shtatë muajt e parë të këtij viti arritën në 380 milionë euro, me rritje rreth 15 për qind në krahasim me të njëjtën periudhë të vitit të kaluar.