Presidenti rus Vladimir Putin është ftuar të bashkohet me “Bordin e Paqes” të Presidentit amerikan Donald Trump, komitetin që do të mbikëqyrë rindërtimin e Gazës, tha zëdhënësi i tij të hënën. Duke folur me gazetarët gjatë një konference të rregullt për shtyp, Dmitry Peskov tha se “Presidenti Putin gjithashtu mori përmes kanaleve diplomatike një ftesë për t'u bashkuar me këtë Bord të Paqes”. Ai tha se Kremlini tani po e shqyrton ftesën dhe “shpreson të marrë më shumë detaje nga pala amerikane”. Themelimi i bordit, i kryesuar nga Trump, është një hap kyç në planin amerikan të mbështetur nga Kombet e Bashkuara për të demilitarizuar dhe rindërtuar Gazën, e cila u shkatërrua nga dy vjet luftë midis Izraelit dhe grupit militant Hamas. I përshkruar nga Trump si “Bordi më i Madh dhe më Prestigjioz i mbledhur ndonjëherë”, komiteti do të përfshijë ish-kryeministrin britanik Tony Blair, kryeministrin kanadez Mark Carney dhe sekretarin e shtetit të SHBA-së Marco Rubio. Presidenti turk Rexhep Tajip Erdogan, presidenti argjentinas Javier Milei dhe presidenti egjiptian Abdel Fattah el-Sisi gjithashtu morën ftesa për t'u bashkuar, sipas deklaratave të tyre, bashkë me kryeministrin shqiptar, Edi Rama.