Polonia nuk duhet të përjashtojë mundësinë e dërgimit të trupave ushtarake në Ukrainë, tha ministri i jashtëm polak, Radoslaë Sikorski, në disa komente të publikuara të martën, ndërsa Rusia vazhdon të avancojë në fushëbetejë. Megjithatë, Sikorski nuk ka specifikuar se çfarë roli do të mund të luanin trupat polake. Ndonëse aleatët e NATO-s, të cilët mbështesin Ukrainën, janë zotuar për të furnizuar shtetin e shkatërruar nga lufta me para dhe armë për aq kohë sa do të duhet, për të luftuar pushtimin rus, ato e kanë përjashtuar mundësinë e dërgimit të ushtarëve në këtë vend. I pyetur përgjatë një interviste nëse Polonia është e gatshme të dërgojë trupa ushtarake në Ukrainë, Sikorski tha se “nuk duhet përjashtuar si mundësi. Presidenti rus, Vladimir Putini duhet të hamendësojë për qëllimet tona”. Intervista është publikuar në tri gazeta, në Poloni, Itali dhe Spanjë.