Trupi i Papa Françeskut u zhvendos në Bazilikën e Shën Pjetrit të mërkurën për të lejuar besimtarët katolikë të bëjnë nderimet e fundit përpara një funerali që pritet të sjellë në Romë Presidentin amerikan Donald Trump dhe dhjetëra liderë të tjerë botërorë. Françesku, një reformator inovator, vdiq në moshën 88-vjeçare të hënën nga një goditje në tru dhe arrest kardiak, duke i dhënë fund një lidershipi shpesh të trazuar 12-vjeçar të kishës katolike, në të cilin ai vazhdimisht u përplas me tradicionalistët dhe mbrojti të varfërit dhe të margjinalizuarit. Trupi i tij, i vendosur në një arkivol të hapur, u mor nga kapela e rezidencës së Vatikanit, ku ai jetonte për tu dërguar në Shën Pjetër, në një procesion madhështor që nisi në orën 9 të mëngjesit. Radhë të gjata njerëzish u panë rreth Vatikanit përpara procesionit, i cili do të pasohet nga një shërbim fetar në bazilikë. Besimtarët dhe publiku i gjerë do të lejohen të nderojnë papën deri në orën 19:00 të së premtes. Ceremonia funerale është planifikuar të mbahet të shtunën në mëngjes në Sheshin e Shën Pjetrit, dhe do të drejtohet nga dekani i kolegjit të kardinalëve, 91-vjeçari Giovanni Battista Re. Të paktën 200,000 njerëz pritet të marrin pjesë në ceremoni, tha kreu i agjencisë italiane të mbrojtjes civile, Fabio Ciciliano, për gazetën Corriere della Sera. Trump, i cili u përplas vazhdimisht me Papën për emigracionin, do të shoqërohet nga zonja e parë Melania. Udhëheqësit nga Italia, Franca, Gjermania, Britania, Ukraina, institucionet e BE-së dhe vendlindja e Françeskut, Argjentina, konfirmuan gjithashtu praninë e tyre.