Miliarderi i teknologjisë dhe bosi i Teslas, Elon Musk i bëri thirrje të drejtpërdrejtë por të pasuksesshme Presidentit amerikan Donald Trump për të ndryshuar tarifat gjatë fundjavës së kaluar, raportoi Ëashington Post të hënën duke cituar dy persona të njohur me këtë çështje. Dhe kjo, shënon mosmarrëveshjen e profilit më të lartë mes Presidentit dhe Musk, thotë gazeta. Raporti pason zbulimin nga Trump të një tarife bazë prej 10% për të gjitha importet në SHBA, së bashku me tarifa të tjera më të larta në dhjetëra vende të tjera. Shtëpia e Bardhë dhe Elon Musk nuk iu përgjigjën kërkesave për koment. Musk, një këshilltar i Trump-it i cili ka punuar për të reduktuar shpenzimet publike në qeverinë amerikane, bëri thirrje për zero tarifa mes SHBA-së dhe Evropës gjatë pjesmarrjes në lidhje video në një kongres të Lega Nord, në Firence të Italisë, në fundjavë. Tesla ka parë rënie të ndjeshme të shitjeve të saj tremujore në mesin e një reagimi të ashpër kundër punës së Musk dhe "Departamentit të Efiçencës Qeveritare" të kryesuar prej tij. Aksionet e kompanisë kanë arritur vlerën e 233,29 dollarëve në bursë, me një rënie prej 42% që nga fillimi i vitit. Musk ka thënë më herët se ndikimi i tarifave për makinat, mbi Teslan, është "i konsiderueshëm". Ekonomistët thonë se tarifat mund të rindezin inflacionin, të rrisin rrezikun e një recesioni në SHBA dhe të rrisin kostot për familjen mesatare amerikane me mijëra dollarë, një problem i madh ky për një president që bëri fushatë me premtimin se do të ulë koston e jetesës për amerikanët.