Presidenti Volodymyr Zelenski u bëri thirrje aleatëve evropianë të enjten që të furnizojnë Ukrainën me armë me rreze të gjatë veprimi, pasi dështoi të merrte një premtim nga Presidenti amerikan Donald Trump për t'i siguruar Kievit raketa të fuqishme Tomahaëk. Zelenski, i cili iu drejtua udhëheqësve të Bashkimit Evropian në Bruksel, u bëri thirrje gjithashtu atyre që të bien dakord sa më shpejt të jetë e mundur për një plan për të përdorur asetet e ngrira ruse dhe tha se Kievi do të përdorte një "pjesë të konsiderueshme" të çdo fondi të vënë në dispozicion për të blerë armë të prodhuara në Evropë. "Kur flasim për armë me rreze të gjatë veprimi për Ukrainën, nënkuptojmë që regjimi i Putinit duhet të ndiejë pasoja të vërteta nga kjo luftë. Ju bëj thirrje të mbështesni gjithçka që ndihmon Ukrainën që të sigurojë aftësi të tilla sepse kjo bën vërtet një ndryshim të madh për Rusinë", tha ai. "Shikoni sa nervoz u bë Putini kur u ngrit kjo temë. Ai e kupton që armët me rreze të gjatë veprimi mund ta ndryshojnë vërtet rrjedhën e luftës." Zelenski ka kërkuar raketa Tomahaëk nga Shtetet e Bashkuara. Trump nuk e përjashtoi furnizimin e Kievit me raketa të tilla gjatë bisedimeve në Uashington me Zelenskin, javën e kaluar, por u duk i ftohtë ndaj kësaj ideje. "Këto armë me rreze të gjatë veprimi nuk janë vetëm në SHBA, disa vende evropiane i kanë gjithashtu. Ne tashmë po flasim me vendet që mund të ndihmojnë", tha Zelenski. Udhëheqësit e BE-së po takohen për të diskutuar planin për të përdorur asetet e ngrira ruse si bazë për një "kredi dëmshpërblimi" prej 140 miliardë eurosh për Ukrainën. Rusia ka sfiduar ligjshmërinë e idesë. Zelenskiy tha se mekanizmi i propozuar ishte tërësisht "ligjor dhe i drejtë". "Është një model i bazuar në idenë e dëmshpërblimeve të ardhshme - duke e mbajtur sulmuesin përgjegjës për dëmin e shkaktuar", shtoi ai.