Ministria e Jashtme e Japonisë tha të martën se kryeministri Fumio Kishida do ta vizitojë Kievin dhe do të bisedojë me presidentin ukrainas, Volodymyr Zelensky. Kishida, shteti i të cilit është anëtar i G7-ës, pritet të shprehë solidaritetin dhe mbështetjen për Ukrainën, pasi Rusia mbi një vit më parë nisi pushtimin e paprovokuar të fqinjit të saj, tha Ministria e Jashtme japoneze. Kishida do të tregojë “respektin e tij për kurajën dhe qëndresën e popullit ukrainas që është ngritur për të mbrojtur atdheun e tyre”, u tha në njoftimin e Ministrisë së Jashtme të Japonisë. Ky udhëtim është po ashtu hera e parë që një kryeministër japonez viziton një vend apo një rajon të përfshirë nga lufta, që nga lufta e dytë botërore, përvecse vizita e parë në Ukrainë e një anëtari aziatik të G7-ës dhe e para nga një aleat i amerikës në rajon. Vizita e Kishidës në Ukrainë vjen në kohën kur presidenti rus, Vladimir Putin, po zhvillon takime në Moskë me homologun e tij kinez, Xi Jinping. E të dyja këto ndalesa, nga Kishida dhe Xi Jinping, nënvizojnë ndasitë e thella në azinë verilindore për sa i takon luftës në Ukrainë, me japoninë që ka premtuar ndihma të domosdoshme për Kievin ndërkohë që Kina mbetet një zë i vetmuar në mbështetje të Putinit gjithnjë e më të izoluar e që tani është kthyer edhe në një armik global dhe në një kriminel të dyshuar lufte. Muajin e kaluar, në prag të njëvjetorit të pushtimit rus, Japonia premtoi 5.5 miliardë dollarë ndihma humanitare për Ukrainën.