Aleati kryesor politik i liderit turk Recep Tayyip Erdogan tha të martën se një amendament kushtetues duhet të merret në konsideratë për të lejuar presidentin të kandidojë përsëri në zgjedhjet e përcaktuara për vitin 2028. Pas rizgjedhjes së tij vitin e kaluar, Erdogan po vazhdon mandatin e tij të fundit si president, nëse parlamenti nuk thërret zgjedhje të parakohshme, sic edhe përcakton kushtetuta. Erdogan ka drejtuar Turqinë për më shumë se 21 vjet, fillimisht si kryeministër dhe më pas si president. "A nuk do të ishte një zgjedhje e natyrshme dhe e drejtë që presidenti ynë të zgjidhet edhe një herë, nëse çrrënjoset terrori dhe nëse i jepet një goditje e rëndë inflacionit dhe Turqia siguron stabilitet politik dhe ekonomik," tha Devlet Bahçeli, kreu i partisë Lëvizja Nacionaliste, MHP, e cila është aleate me Partinë AKP-në në pushtet të Erdoganit. Duhet të konsiderohet një amendament kushtetues për të siguruar aftësinë e Erdoganit për të rikandiduar në zgjedhjet presidenciale, tha ai në një fjalim para ligjvënësve të MHP-së. Bahçeli, një nacionalist i vendosur, tronditi politikën turke muajin e kaluar duke sugjeruar që lideri i burgosur i Partisë së jashtëligjshme të Punëtorëve të Kurdistanit të lirohet nga burgu nëse shpall fundin e kryengritjes së grupit. Disa analistë thanë se sugjerimi tronditës mund të motivohet nga një dëshirë e AKP-së dhe MHP-së për të fituar mbështetjen e Partisë pro-kurde DEM, e treta më e madhe në parlament, për një ndryshim kushtetues që mund të rrisë perspektivat e Erdoganit në zgjedhjet e 2028-ës. Një ndryshim kushtetues mund të hidhet në referendum nëse 360 ligjvënës në parlamentin prej 600 vendesh e mbështesin atë. Zgjedhjet e parakohshme kanë nevojë edhe për mbështetjen e 360 deputetëve.