Pavarësisht rezistencës së shoqërisë civile, deputetëve opozitarë dhe vendimeve të gjykatave që e kanë pezulluar përkohësisht, ministrja e Brendshme britanike, Suella Braverman këmbëngul që ta çojë deri në fund për të strehuar në Ruanda azilkërkuesit, përfshirë këtu edhe ata shqiptarë. Braverman ka folur për BBC, duke kundërshtuar edhe deklaratat e OKB-së, që tha se azilkërkuesve në Ruanda do t’u rrezikohej jeta, por edhe qëndrimi në kampe me kushte mjerane. Ajo tha se Ruanda është vend i sigurtë për azilkërkuesit dhe se plani për zhvendosjen e tyre në shtetin afrikan nuk shkel të drejtat e njeriut. Nëse avancohet me këtë projekt, rrezikojnë që në Ruanda të strehohen edhe mijëra shqiptarë, që kanë aplikuar për azil në Britaninë e Madhe. Vetëm vitin e kaluar ishin të paktën 14 mijë shqiptarë që kaluan La Manshin me varka dhe kërkuan azil. Fluksi ka vënë në qendër të vëmendjes shqiptarët në ishull, të cilët disa herë janë përfshirë në debatet e politikës së brendshme britanike, ku vetë Braverman përgjithësoi në një deklaratë të saj duke quajtur shqiptarët kriminelë.