Presidenti amerikan Donald Trump, ka njoftuar se armëpushimi mes Izraelit dhe Libanit është zgjatur edhe me tre javë të tjera, pas takimit të tij me të dërguarit e dy vendeve të enjten vonë. Por, me gjithë armëpushimin, dhuna përgjatë kufirit Izrael–Liban ka vazhduar. “Takimi shkoi shumë mirë!”, shkroi Trump në Truth Social të enjten vonë. “Shtetet e Bashkuara do të punojnë me Libanin për ta ndihmuar atë që të mbrohet nga Hezbollahu. Armëpushimi mes Izraelit dhe Libanit do të zgjatet për trë javë”, shtoi ai. Armëpushimi ishte parashikuar të përfundonte më 26 prill. Hezbollahu, i mbështetur nga Irani, kontrollon pjesën më të madhe të Libanit jugor. Qeveria e Libanit nuk është pjesëmarrëse aktive në konflikt dhe është zotuar se do ta çarmatosë Hezbollahun. Trumpi tha se pret “që së shpejti” të presë në një takim kryeministrin e Izraelit, Benjamin Netanyahu, dhe presidentin e Libanit, Joseph Aoun. Trump, zëvendës/presidenti JD Vance, dhe sekretari i shtetit Marco Rubio, së bashku me ambasadorët amerikanë në Izrael dhe Liban, ishin të pranishëm në takimin e zhvilluar të enjten me “përfaqësues të rangut të lartë” të Izraelit dhe Libanit. Ambasadorja e Libanit në SHBA, Nada Hamadeh Moaëad, dhe ambasadori i Izraelit në SHBA, Yechiel Leiter, përfaqësuan vendet e tyre në bisedime. Njoftimi i Trumpit erdhi edhe pse dhuna u përshkallëzua pranë kufirit Izrael–Liban, me të dyja palët që lëshuan raketa ndaj njëra-tjetrës pas akuzave për shkelje të armëpushimit 10-ditor që kishte hyrë në fuqi më 16 prill.