Presidenti ukrainas, Volodymyr Zelensky, tha se vendi i tij ka nevojë për ndihmë financiare nga Evropa për të vazhduar luftën kundër forcave ruse për dy apo tre vite të tjera. Kievi është varur kryesisht nga mbështetja ushtarake dhe financiare e aleatëve për të zbrapsur ushtrinë e Moskës, e cila nisi pushtimin e plotë të vendit fqinj në shkurt 2022. “Unë e theksova këtë përsëri për të gjithë udhëheqësit evropianë. U thashë atyre se ne nuk do të luftojmë për dekada, por ju duhet të tregoni që për një kohë do të mund të siguroni mbështetje të qëndrueshme financiare për Ukrainën”, tha Zelensky të martën. “Dhe pikërisht për këtë arsye ata kanë këtë program në mendje, 2 deri në 3 vjet”, tha Zelenski, duke iu referuar planeve të Brukselit për të përdorur asetet e ngrira ruse për të ndihmuar Kievin.