Është zbardhur dëshmia e Lazer Bashit, i vetmi i mbijetuar nga atentati i ndodhur pasditen e së dielës në Dukagjin, ku mbetën të vrarë babë e bir, Prelë dhe Lek Gjoni. Në momentin kur automjeti u zu në pritë, ai ndodhej në pjesën e pasme të fouristradës, ndërsa nga të shtënat mori një plumb në shpatull. Ai ka treguar para grupit hetimor se priti që të largoheshin autorët, më pas ka dalë nga automjeti dhe ka tentuar të telefonojë policinë, por nuk kishte valë në telefon. Më pas ka ecur rreth 2 kilometra në këmbë deri në vendin më të afërt ku kapnin valët, ku ka njoftuar fillimisht ambulancën dhe policinë më pas familjarët. I mbijetuari nuk ka arritur dot t’i shohë atentatorët. Sipas të dhënave, bëhet fjalë për dy autorë pasi në vendin e ngjarjes janë gjetur 50 gëzhoja, të lëshuara nga dy armë të ndryshme. Mbërritja e ambulancës dhe policisë në vendin e ngjarjes ishte tepëer vonë për Prelë dhe Lekë Gjonin pasi kishin ndërruar jetë si pasojë e plagëve. Viktimat po udhëtonin nga banesa e tyre e vjetër në Dukagjin, në drejtim të Shkodrës, por rreth dy kilometra pas ndarjes së rrugës së Pultit me Shohin, automjeti u zu në pritë dhe u qëllua me breshëri plumbash.