Norvegjia është tallur me kritikat e Donald Trumpit ndaj vendit, duke publikuar një listë të "tualeteve" të saj më piktoreske. Të dielën e kaluar, Presidenti amerikan i ashpërsoi fyerjet ndaj Norvegjisë, duke e quajtur atë një "vend-nevojtore", pasi nuk iu dha Çmimi Nobel për Paqen. Duke ia atribuar trazirat e fundit në Francë emigracionit, Trump tha se do t'i mirëpriste emigrantët nga disa vende, por jo nga Norvegjia, "sepse nuk e mora Çmimin Nobel. Kështu që nuk dua askënd nga Norvegjia", u shpreh ai. Trumpi i bëri këto komente gjatë një tubimi politik në Miçigan dhe shtoi se emigrantët nga Norvegjia nuk janë të mirëpritur në SHBA. Presidenti tha gjithashtu se Norvegjia ta shpif pasi komiteti i nobelit nuk i dha atij nobelin e paqes edhe pse e meriton më shumë se kushdo tjetër. "Sinqerisht Norvegjia ta shpif. Norvegjia është bërë një 'vend-nevojtore'", tha Trump, duke përdorur një term që më parë e ka përdorur edhe për Haitin, Libinë, Somalinë dhe Jemenin. Si kundërpërgjigje, bordi i turizmit i Norvegjisë prezantoi këtë javë në faqen e tij të internetit disa nga tualetet më të bukura të vendit. "A janë këto 'nevojtoret' më të mira në botë?" – pyeti *Visit Norëay*, duke shtuar: "Norvegjia i bën 'nevojtoret' të shkëlqyera sërish!" Poshtë fotove bordi shtoi: "Këto tualete ia vlen të vizitohen, si atëherë kur keni vërtet nevojë, ashtu edhe kur nuk keni." Disa prej tualeteve kishin madje pamje mahnitëse të fjordeve, lumenjve, ujëvarave dhe disa prej peisazheve më spektakolare të Norvegjisë.