Marrëveshja midis Italisë dhe Shqipërisë për ngritjen e një kampi emigrantësh në vendin tonë, është e para e këtij lloji, megjithëse Bashkimi Europian më herët ka hyrë në marrëveshje me Turqinë, Marokun dhe Libinë për të ndaluar hyrjen e emigrantëve në bllok. Në një intervistë për Il Messaggero, kryeministrja italiane Georgia Meloni deklaroi se kjo marrëveshje mund të shndërrohet në një model bashkëpunimi mes vendeve të BE-së dhe vendeve jashtë unionit, për trajtimin e flukseve të emigrantëve. Plani i Italisë i ngjan një marrëveshjeje të diskutueshme që Mbretëria e Bashkuar arriti në prill 2022 për të dërguar azilkërkues në Ruandë, në Afrikën Lindore. Ky plan u ndal vetëm disa orë përpara se të bëheshin dëbimet e para në qershor 2022, pas një ndërhyrjeje nga Gjykata Evropiane e të Drejtave të Njeriut. Në atë kohë, Kombet e Bashkuara dënuan partneritetin e emigracionit Mbretëri e Bashkuar-Ruandë për eksternizimin e detyrimeve themelore të Britanisë ndaj njerëzve që kërkojnë azil dhe paralajmëruan se një model i tillë azili do të minonte sistemin ndërkombëtar të mbrojtjes së refugjatëve.