Një ngjarje tronditëse që ka shokuar opinionin publik në Greqi është zbardhur pjesërisht, pasi autoritetet kanë identifikuar gruan, trupi i së cilës u gjet më 18 korrik brenda një valixheje në një ndërtesë të braktisur në Athinë. Sipas mediave greke, viktima është një shtetase britanike 38-vjeçare, e lindur në Skoci. Ajo kishte mbërritur në Greqi më 29 qershor, pasi kishte udhëtuar nga Shtetet e Bashkuara nëpërmjet Qipros. Hetuesit po shqyrtojnë edhe mundësinë që ajo të ketë qenë duke punuar në Greqi. Identifikimi u bë i mundur falë bashkëpunimit mes autoriteteve greke, Interpolit dhe shërbimeve amerikane. Fillimisht, identiteti i saj nuk mund të konfirmohej përmes bazave të të dhënave në dispozicion, ndaj gjurmët e gishtërinjve u dërguan jashtë vendit. Përgjigjja përfundimtare erdhi nga autoritetet amerikane. Pas identifikimit, policia ka njoftuar Ambasadën Britanike në Greqi dhe familjarët e viktimës, ndërsa po përpiqet të rindërtojë lëvizjet e saj që nga mbërritja në Greqi. Hetuesit po verifikojnë me kë ka udhëtuar, ku ka qëndruar dhe cilët persona ka takuar gjatë ditëve të fundit të jetës.