Rregulla të reja që ndalojnë përdorimin e altoparlantëve dhe kufizojnë madhësinë e grupeve turistike në 25 persona, kanë hyrë në fuqi në Venecia. Masat janë ndërmarrë për të kufizuar ndikimin e turizmit masiv në qytetin italian, thonë zyrtarët. Kanalet e lagjes historike të Venecias e bëjnë qytetin një nga vendet më të vizituara në Evropë. Venecia prezantoi një tarifë hyrjeje ditore prej 5 eurosh në fillim të këtij viti, pasi fillimisht ndaloi anijet e lundrimit të ankoroheshin, në vitin 2021. Turizmi masiv konsiderohet gjerësisht si një nga çështjet më urgjente për Venecian, e cila ka një popullsi lokale prej rreth 250,000 banorësh ndërkohë që janë më shumë se 10 milionë vizitorët që vijnë në qytet, cdo vit. Venecia ka parë një eksod të banorëve vendas nga frika se turistët mund të pushtojnë qytetin historik të ishullit. Ndryshimet në rregullat e turizmit vijnë pasi ekspertët nga Unesco paralajmëruan vitin e kaluar se Venecia mund të shtohet në listën e vendeve të trashëgimisë botërore në rrezik, pasi ndikimi i ndryshimeve klimatike dhe turizmit masiv kërcënojnë të shkaktojnë ndryshime të pakthyeshme në këtë qytet. Organi kulturor i OKB-së nuk e shtoi Venecian në listë, në përfundim, pasi autoritetet lokale hartuan plane për adresimin e problemeve përmes një sistemi kundër përmbytjeve dhe masave për të reduktuar ndikimin e turizmit masiv.