Kryedemokrati Berisha gjatë një takimi me krerët e degëve të Tiranës pasditen e kësaj të shtune hodhi sërish akuza në drejtim të kreu të qeverisë Edi Rama për ndërmarrjen e një akti antikushtetues lidhur me ceshtjen Balluku që, sipas tij, bllokon sistemin e drejtësisë. ‘Në një akt antikushtetues, ai bllokoi në mënyrë brutale veprimin e sistemit të drejtësisë. Edi Rama përdori 83 mandatet e tij të krimit për t'i vënë çelësat asaj dege të pushtetit pa të cilin ndarje pushtetesh nuk ka. Rama ndërmori këtë akt edhe pas paralajmërimeve të përsëritura të partnerëve kryesorë ndërkombëtarë në procesin e integrimit europian, por dhe të partnerëve të tjerë. Ai mori një akt ekstremis sepse e kuptoi, e realizoi që dosja Balluku ishte dosja Rama.’ Berisha shtoi se protesta e opozitës vazhdimisht ka nxjerrë në pah skandalet e korrupsionit të qeverisë. ‘pak vite më parë nuk janë diskutuar kurrë kërkesat e prokurorëve për heqje të imunitetit të ministrave dhe zv.kryeministrave dhe që as mund të diskutohen … Me kryengritjen tonë paqësore ne kemi damkosur Ramën dhe qeverinë e tij. Kemi faktuar se shqiptarët nuk pajtohen me bllokimin e shtetit ligjor’. Rama, sipas Berishës këto veprime i bën për të shpëtuar lëkurën e tij, nga vjedhjet e vazhdueshme që i janë bërë qytetarëve shqiptarë, për të cilët thotë se zgjidhja e vetme janë protestat për të rrëzuar atë që e cilëson regjim autokratik.