Presidenti rus Vladimir Putin u zotua të hënën se Moska do të përmbushë të gjitha synimet që i ka vendosur vetes në Ukrainë, në vitin e tretë të konfliktit. "E vërteta është në anën tonë. Të gjitha qëllimet e vendosura do të arrihen," tha Putin në një video-mesazh të publikuar në përvjetorin e dytë të asaj që Rusia e quan "Dita e Ribashkimit", kur Moska aneksoi katër rajone ukrainase. Pasi dërgoi trupa në Ukrainë në shkurt 2022, Rusia aneksoi rajonet e Lugansk, Donetsk, Zaporizhzhia dhe Kherson. Ajo nuk kontrollon plotësisht të gjithë territorin në këto rajone. Në fjalimin e tij, Putin përsëriti justifikimin e tij për dërgimin e trupave në Ukrainë si mbrojtjen e rusishtfolësve kundër një "diktature neo-naziste" që synonte "t'i shkëputte ata përgjithmonë nga Rusia, atdheu i tyre historik".