Marina ruse filloi stërvitjet e planifikuara që përfshijnë pjesën më të madhe të flotës së saj në oqeanet Arktik dhe Paqësor, si edhe në detet Baltik dhe Kaspik, tha të martën ministria e mbrojtjes. Rusia konsiderohet nga shumica e analistëve ushtarakë se ka marinën e tretë më të fuqishme në botë pas atyre të Shteteve të Bashkuara dhe Kinës, dhe Rusia ka një flotë të konsiderueshme të nëndetëseve bërthamore me raketa balistike. Stërvitjet ruse, të cilat përfshijnë 20,000 personel dhe 300 anije, do të testojnë gatishmërinë dhe aftësitë e marinës në të gjitha nivelet, tha ministria. Stërvitjet do të përfshijnë mbi 300 ushtrime luftarake duke përfshirë praktikimin e përdorimit të raketave kundërajrore, artilerisë, armëve anti-nëndetëse dhe "ndërhyrje pasive", shtoi ministria. “Njësitë dhe formacionet e Marinës Ruse kanë filluar të kryejnë stërvitje të planifikuara në zonat operacionale të Flotës Veriore, Paqësorit dhe Balltikut, si dhe në zonën e përgjegjësisë së Flotilës së Kaspikut”, tha ministria. "Qëllimi kryesor i stërvitjeve është të kontrollojë veprimet e autoriteteve ushtarake të marinës në të gjitha nivelet, si dhe gatishmërinë e ekuipazheve të anijeve, njësive të aviacionit detar dhe trupave bregdetare të marinës ruse për kryerjen e detyrave." Rreth 300 anije dhe nëndetëse, rreth 50 avionë dhe më shumë se 200 njësi të pajisjeve ushtarake dhe speciale do të përfshihen në stërvitjen luftarake, tha ministria. Që kur presidenti Vladimir Putin dërgoi mijëra trupa në Ukrainë në shkurt 2022, flota ruse e Detit të Zi - i vetmi formacion i flotës ruse që nuk merr pjesë në stërvitje - ka luftuar për t'u përshtatur me luftën dinamike moderne të dronëve dhe shefi i marinës u zëvendësua më herët kete vit.