Zgjedhjet për Parlamentin Evropian u pasuan nga dobësimi i euros kundrejt dollarit amerikan. Mëngjesin e së hënës, një euro u këmbye me më pak se 1.08 dollarë, ndërsa gjatë pjesës më të madhe të javës së kaluar ajo këmbehej me afro 1.09 dollarë. Analistët thonë se rënia nuk duket e madhe por pasqyron mënyrën se si ndihen njerëzit në tregjet ekonomike. “Rezultatet e zgjedhjeve në BE treguan rritje të mbështetjes për partitë e krahut të djathtë, gjë që edhe pritej, por elementi surprizë është se presidenti i Francës, Emmanuel Macron reagoi duke thirrur zgjedhje të parakohshme. Kjo e bën tregun më nervoz”, tha për agjencinë Reuters Lee Hardman, analist i monedhës së përbashkët evropiane në kompaninë e shërbimeve financiare, MUFG. Lëvizje të ngjashme u panë edhe në bursa, pasi aksionet e mëdha në të gjitha tregjet kryesore evropiane shënuan rënie. Zgjedhjet për Parlamentin Evropian u mbajtën nga data 6 deri më 9 qershor. Partitë e ekstremit të djathtë shënuan rritje në disa shtete të Evropës, përfshirë Francën dhe Gjermaninë. Në Francë, presidenti Emmanuel Macron shpalli zgjedhjet e parakohshme, pasi partia e tij pësoi humbje të madhe kundrejt partisë së ekstremit të djathtë, Fronti Kombëtar.