Zhdukja e Ervis Martinajt vijon të mbetet një nga misteret më të mëdha kriminale në vend. I ftuar në emisionin “Shqipëria Live”, gazetari investigativ Artan Hoxha deklaroi se tashmë ekzistojnë informacione konkrete lidhur me personin që dyshohet se ka kryer ekzekutimin e Martinajt, si edhe me shumën që pretendohet se është paguar për eliminimin e tij. Sipas Hoxhës, autorët dhe rrethanat e ngjarjes janë të njohura në qarqe hetimore, ndërsa ai la të kuptohet se bëhet fjalë për një shumë të konsiderueshme parash. Gazetari theksoi se Martinaj ishte një figurë publike e njohur, i pranishëm shpesh në jetën e natës dhe i rrethuar nga personazhe të ekranit, politikës dhe medias. Ai u shpreh se gabimi më i madh i ish-biznesmenit ishte fuqia që krijoi me kalimin e viteve, duke mos arritur ta menaxhonte apo kontrollonte më ndikimin që kishte fituar. Artan Hoxha kërkoi gjithashtu më shumë transparencë nga institucionet ligjzbatuese, duke thënë se familjarët e Martinajt meritojnë të marrin të paktën informacionet bazë mbi fatin e tij, pa u cënuar hetimet.