Europa po përballet me një situatë alarmante lidhur me përdorimin e kokainës, një fenomen që po merr përmasa të mëdha dhe që ka ngritur shqetësime për shëndetin publik. Kështu e ka paraqitur situatën Joan Ramon Villalbi, delegat i Qeverisë Spanjolle për Planin Kombëtar Kundër Drogës. Sipas tij, ky është një problem shumë i rëndësishëm për disa shtete të Europës, ku përdorimi i kokainës është duke u rritur në mënyrë dramatike. Villalbi theksoi se pavarësisht se kanabisi mbetet droga më e përdorur në disa shtete europiane, kokaina paraqet një kërcënim më të madh për shëndetin e shoqërisë. Alarmi i Villalb vjen pas një periudhe shtimi të prodhimit të kokainës në Amerikën Latine, sidomos në Kolumbi dhe Peru,, duke sjelle në këtë mënyrë dhe rritjen e furnizimit me këtë drogë në tregjet ndërkombëtare. Krahas rreziqeve që kanë tek shëndeti, përdorimi i kokainës ka një ndikim të madh në sigurinë dhe stabilitetin social të vendeve, duke kontribuar në rritjen e krimit të organizuar dhe të pasojave të tjera negative.