Këtë të diel aeroporti i Vilniusit në Lituani u mbyll përkohësisht pas raportimeve për një dron fluturues të dyshuar në hapësirën ajrore pranë aeroportit. Autoritetet aktivizuan procedurat e sigurisë dhe pezulluan përkohësisht operimet në aeroport, ndërsa nisën verifikimet për të përcaktuar natyrën e objektit të dyshuar. Pas kontrolleve, autoritetet lituaneze konfirmuan se objekti i raportuar nuk ishte një dron, por një tufë zogjsh. Incidenti ndodhi në një moment kur vendet baltike kanë rritur ndjeshëm vigjilencën për sigurinë ajrore, për shkak të luftës në Ukrainë dhe incidenteve të përsëritura me mjete fluturuese pranë hapësirës ajrore të vendeve anëtare të NATO-s. Edhe pse situata në Vilnius nuk rezultoi të kishte lidhje me ndonjë kërcënim real, rasti riktheu në vëmendje nivelin e lartë të alarmit në rajon, veçanërisht përballë tensioneve që lidhen me luftën Rusi-Ukrainë. Ndërkohë, në Ukrainë vijojnë raportimet për sulme ruse. Presidenti ukrainas Volodymyr Zelensky ka denoncuar gjithashtu një sulm ndaj një treni pranë kufirit me Poloninë.