Një shtetas I huaj 72-vjeç ka përfunduar në prangat e Policisë së Kosovës, pasi ndaj tij Gjykata Themelore në Prishtinë kishte lëshuar një urdhër-arresti. Kadri Xhemaili, u arrestua të dielën në pikën kufitare Stançiç, pasi ishte në kërkim kërkohej në kuadër të hetimeve për veprën penale “Dhuna ndaj përfaqësuesve të lartë të Republikës së Kosovës”. 72-vjeçari dyshohet se më 30 tetor 2025, përmes rrjetit social Facebook, kishte publikuar përmbajtje me karakter kërcënues ndaj Kryeministrit në detyrë Albin Kurti. Arrestimi i tij u realizua gjatë kontrollit kufitar, ku nga verifikimet rezultoi se ndaj tij ishte aktiv urdhër-arresti i lëshuar nga gjykata. Prokuroria Speciale e Republikës së Kosovës (PSRK), ndaj të dyshuarit ka caktuar ndalimin e tij për 48 orë, ndërsa hetimet lidhur me rastin janë duke vazhduar.