Inspektori i Lartë i Drejtësisë, Artur Metani ka nisur procedim disiplinor ndaj nënkryetarit të Këshillit të Lartë të Prokurorisë, Alfred Balla dhe dy anëtarëve të tjerë, Nurihan Seiti dhe Tartar Bazaj. Ky procedim nisi në bazë të një informacioni të dorëzuar nga Operacioni Ndërkombëtar i Monitorimi, ku këta 3 anëtarë akuzohen për konfikt interesi në promovimin e drejtueses së Prokurorisë së Tiranës, Elisabeta Imeraj, ndërsa kishin të punësuar familjarët e tyre në këtë institucion. Nisja e procedimit për tre anëtarët u njoftua nga Këshilli I Lartë I Prokurorisë këtë të mërkurë. Tre anëtarët e Këshillit të Lartë të Prokurorisë u referuan për ‘konflikt interesi’ në zyrën e Inspektorit të Lartë të Drejtësisë prej 15 prillit 2021 nga Operacioni Ndërkombëtar i Monitorimit, ndërsa verifikimi i rastit nisi tre muaj më pas, më 8 korrik. Sipas informacionit të Operacionit Ndërkombëtar të Monitorimit, në kohën e votimit të Imerajt në krye të Prokurorisë së Tiranës, Tartar Bazaj dhe Nurihan Seiti kishin të punësuara vajzat në këtë institucion, ndërsa nënkryetari i KLP-së, Alfred Balla kishte të punësuar nipin.