Gjendja fizike e Vladimir Putin mbetet e mbuluar nga misteri. Thashethemet rreth problemeve të dyshuara shëndetësore të presidentit rus kanë qarkulluar për vite me radhë, të nxitura nga hetimet gazetareske, spekulimet në mediat sociale dhe deklaratat e udhëheqësve politikë, por gjithmonë të shoqëruara nga heshtja ose mohimet zyrtare nga Kremlini. Këto dyshime u rikthyen së fundmi në qendër të vëmendjes pas paraqitjes së tij në paradën ushtarake të 3 shtatorit në Pekin, por ishin ngritur tashmë më herët nga disa gazeta në të gjithë botën. Historia më e detajuar daton që nga viti 2022, kur media e pavarur Proekt raportoi praninë e vazhdueshme të mjekëve të specializuar, përfshirë një onkolog dhe dy specialistë të ORL-së, në udhëtimet e presidentit rus. Regjistrat e fluturimeve treguan dhjetëra vizita mes viteve 2017 dhe 2021, duke nxitur hipotezën e kancerit të tiroides. Po atë vit, Neësëeek raportoi një operacion për të hequr një tumor të avancuar, një pretendim që megjithatë u mohua nga Ministri i Jashtëm Sergei Lavrov. Në nëntor, pasi u publikua një video që tregonte Putinin duke u përpjekur të mbante duart pa lëvizur, zyrtari ukrainas Anton Gerashenko foli për sëmundjen e Parkinsonit. Gjatë asaj periudhe, presidenti rus kishte qenë larg kamerave për dy javë dhe Kremlini tha se ai po i nënshtrohej kontrolleve rutinë. Vëzhgime të tjera kishin të bënin me shikimin e tij: në një video të janarit, Putin lexoi një fjalim me shkronja jashtëzakonisht të mëdha. Dyshime të reja ndërkohë lindën pas pardës së pekinit. Massimo D'Alema, ish kryeministër i italisë në vitet 1998-2000, i cili ishte i pranishëm në këtë ngjarje, i tha Corriere della Seras se e pa Putinin "shumë të lodhur", duke u mbështetur tek dy persona ndërsa ecte. Në një bisedë me Xi Jinping, vetë udhëheqësi rus kishte trajtuar temën e jetëgjatësisë, duke pretenduar se bioteknologjia mund t'u lejojë njerëzve të jetojnë deri në 150 vjet. Spekulimet kanë arritur deri në pikën sa përfshijnë edhe mundësinë e përdorimit të sozive, një mundësi e përmendur shpesh kjo nga Presidenti ukrainas Volodymyr Zelensky, i cili në mars tha: “Putini do të vdesë së shpejti dhe kjo luftë do të mbarojë”.