Ligjvënësit do të kenë një agjendë të ngjeshur me çështjet e integrimit në Bashkimin Europian. Në total gjatë këtij sesioni parlamentar janë 41 projektligje që vijnë në Kuvend për të përmbushur detyrat e lëna nga Brukseli për 14 kapituj të negociatave. Një pjesë e mirë e projektligjeve i përkasin sektorit të ekonomisë. Konkretisht pritet të ketë ndryshime në kuadrin ligjor të prokurimeve publike dhe po ashtu në prokurimet në fushën e mbrojtjes dhe sigurisë. Në kuadër të përmbushjes së direktivave të kapitullit 17 që ka të bëjë me politikën ekonomike dhe monetare, priten ndryshime edhe në projektligjin për bankën e shqipërisë dhe tek këshilli fiskal. Po ashtu, ministria e financave ka depozituar në kuvend një ndryshim ligjor edhe sa i takon parandalimit të Pastrimit të Parave. Për kapitullin 23 që ka të bëjë me gjyqësorin dhe të drejtat themelore, në planin e punës së ligjvënësve parashikohen dy projektligje që lidhen me financimin e partive politike, donacionet dhe sponsorizimet.