Lampedusa është shndërruar në një pikë shumë të nxehtë të zbarkimit të emigrantëve që vijnë me anije të ndryshme nga vendet afrikane, teksa aktualisht numri i tyre në qendrën e emigracionit të ngritur nga autoritetet italiane, e kalon shifrën 4000. Rojat bregdetare kanë shtuar patrullimin dhe po u viojnë në ndihmë të gjithë emigrantëve që janë në det të hapur, me destinacion brigjet italiane, teksa mes emigrantëve raportohet një numër i konsiderueshëm grash dhe fëmijësh. Gjithashtu bëhet e ditur se më shumë se 200 prej emigrantëve janë të mitur, të pashoqëruar, nëj fenomen i ri ky tashmë, me shumë familje që dërgojnë fëmijët e tyre të mitur në emigrim shumë herët, me shpresën e integrimit të shpejtë të tyre. Zbarkimi i orëve të fundit në Lampedusa përfaqëson një kulm të paprecedentë për ishullin, për një numër shumë të madh emigrantësh, të mbërritur në një hapësirë kohore mjaft të shkurtër. Ndërkohë autoritetet italiane po menaxhojnë edhe aktivitetin e pritjes së emigrantëve, duke u ofruar fillimisht një kontroll shëndetësor dhe më pas procesin e eidentifikimit nga policia. Më pas emigrantët dërgohen në qendra pritjeje, për një përgjigje mbi aplikimet për azil që bëjnë. Pamjet: AFP