Qeveria pritet të prezantojë iniciativën “Dyfisho ndërmarrjen tënde”, një program kreditimi me interesa më të arsyeshme sesa ato komerciale të bankave të nivelit të dytë dhe me garanci shtetërore. Burime nga përfaqësues të shoqatave të bizneseve në vend, që janë njohur me draftin e kësaj nisme ligjore, sqarojnë se garancia shtetërore do të vlejë vetëm për investime në teknologji dhe digjitalizim, certifikim dhe arritjen e standardeve europiane si laboratorë analizash, apo studio modelimi. Kjo mbështetje financiare nuk mund të përdoret për blerjen e lëndëve të para apo për kapitalin qarkullues. Garancia shtetërore mund të përdoret edhe për investime në infrastrukturë, në rast zgjerimi apo ndërtimi objektesh të lidhura me biznesin, deri në 25% të vlerës së investimit. Vlera maksimale e financimit do të jetë deri në 2 milionë euro, e disbursuar në monedhën lek. Garancia Shtetërore do të jetë e aksesueshme për të gjitha bizneset.