Dy prej vrasjeve që nuk të harrohen ndoshta kurrë nga shqiptarët përgjatë vitit 2021 është ajo e fëmijës 8 vjeç në Fier dhe e kamerierit në Shkodër, në masakrën e plazhit të Velipojës me katër viktima. Në memorien e shqiptarëve do të qëndrojë gjatë vrasja e regjistruar në Fier, kur Mateo Vasiu vetëm 8 vjeç u vra nga fqinji i tij. Një ngjarje që nuk mund të harrohet kurrë, pasi bëhet fjalë për një krim makabër ndaj një fëmije. Klodian Çalamani ishte autori i vrasjes, një person gjakftohtë, me precedentë të mëparshëm penalë dhe nuk është pak të thuhet edhe i rrezikshëm për të gjithë zonën. Vrasja tronditëse u regjistrua në fshatin Grecalli të Fierit, ku 8-vjeçari u vra nga fqinji e më pas u gropos në oborrin e shtëpisë së autorit. Trupi i viktimës u gjet pas disa orësh kërkimesh nga policia. Mateo Vasiu ishte një 8-vjeçar që frekuentonte shkollën, kishte ëndrra për të ardhmen, të cilët u prenë në mes.