Dy persona u gjetën të vdekur pas një zjarri i cili, i ndihmuar nga erërat e forta, shpërtheu i pakontrolluar pranë një zone të thyer malore në rajonin qendror grek të Korinthit të hënën, thanë autoritetet greke. Qindra zjarrfikës, të ndihmuar nga nëntë avionë, luftuan me zjarrin që shpërtheu të dielën pranë qytetit bregdetar të Xylokastro në gadishullin e Peloponezit, rreth 120 km në perëndim të Athinës. Zjarri bëri të detyrueshëm evakuimin e disa fshatrave. Zëdhënësja e policisë greke tha se trupat e gjetur ishin djegur rëndë dhe se testet laboratorike ishin të nevojshme për identifikimin e tyre. Trupat e karbonizuar u zbuluan në afërsi të fshatit Elliniko në zonën ku dy persona ishin raportuar të zhdukur që prej të dielës në mbrëmje. Raportet sugjerojnë se dy persona nxituan me një motoçikletë për të ndihmuar një mik që të mbronte kopenë e deleve nga zjarri në pyll.