Maqedonia e Veriut të mërkurën mban raundin e parë të zgjedhjeve presidenciale që shihen si një test kyç për partitë politike që përplasen rreth bisedimeve të bllokuara të anëtarësimit të vendit në BE. Zgjedhjet në vendin që ndryshoi edhe emrin në 2018 për të zgjidhur një mosmarrëveshje historike me Greqinë, mbivendosen me zgjedhjet parlamentare që priten pas dy javësh. Shtatë kandidatët presidencialë janë përplasur për një kusht kyç për anëtarësimin në BE: njohjen e pakicës së vogël bullgare të vendit në kushtetutë. Bullgaria, anëtare e bllokut, ka bllokuar procesin e anëtarësimit prej dy vitesh nën këtë pretekst. Dy armiq të vjetër politikë, presidenti aktual Stevo Pendarovski, i mbështetur nga socialdemokratët dhe Gordana Siljanovska-Davkova, e mbështetur nga opozita e krahut të djathtë, konsiderohen kandidatët kryesorë për një balotazh të mundshëm më 8 maj, me këtë të fundit që për momentin është në krye të sondazheve. Pas tyre vijnë edhe pesë kandidatë të tjerë, mes të cilëve ministri i jashtëm Bujar Osmani, i mbështetur nga BDI e Ali Ahmetit dhe arben Taravari i koalicionit opozitar të shqiptarëve të maqedonisë.