Dy shqiptarë dyshohet se kanë qenë në furgonin me tifozë të PAOK-ut që u përfshi në aksidentin tragjik të martën në Rumani, teksa ishin duke udhëtuar drejt francës për të ndjekur ndeshjen e skuadrës së tyre me Lionin për Europa League të enjten në orën 21:00. Nga aksidenti, shtatë tifozë kanë gjetur vdekjen në vendngjarje, ndërsa tre të tjerë kanë mbetur të plagosur në gjendje të rëndë. Sipas mediave greke, njëri prej shqiptarëve, që dyshohet se ka qenë edhe drejtuesi i mjetit, ka gjetur vdekjen në vendngjarje, ndërsa tjetri është plagosur. Hetimet paraprake të autoriteteve greke dhe rumune tregojnë se furgoni me dhjetë persona ishte marrë me qira, teksa viktima dhe të plagosurit jetonin në Selanik, Aleksandri dhe Katerina të Greqisë. Pamjet filmike nga aksidenti tregojnë se shkak i përplasjes ka qenë një manovër e gabuar parakalimi e drejtuesit të furgonit me tifozët në bord.