Në fjalën e gjatë që mbajti para asamblesë së partisë, kryesocialisti Edi Rama foli për nevojën e reformave pothuajse në çdo fushë për të realizuar objektivin e mandatit të katërt dhe premtimin e tij të fushatës për zgjedhjet e 11 majit; anëtarësimin në Bashkimin Europian brenda vitit 2030. Mes rreshtave, Rama citoi dy reforma të ndërlidhura me njëra-tjetrën sa i takon rezultatit të zgjedhjeve parlamentare. E para ishte ndryshimi i Kushtetutës për të tkurrur numrin e deputetëve në parlament nga 140 aktualisht në të paktën jo më shumë se 101. Në këtë pjesë, Rama foli edhe për adresimin e rekomandimeve të OSBE, përfshirë këtu depolitizimin e komisioneve zgjedhore. E dyta ishte reforma e re administrative e territoriale. Rama nuk dha më shumë detaje në këtë pjesë, por tha se reforma territoriale është e domosdoshme në kuadër të rrugës së integrimit të vendit. Gjysma e punës për këtë reformë konsiderohet e kryer në vitin 2015, kur u reduktua numri i bashkive dhe komunave nga 360 të tilla në 61 bashki. Ky ishte një nga tre variantet e propozuara 10 vite më parë. Dy variantet e tjera parashikonin ndarjen e vendit në 3 ose 4 rajone, duke hequr qarqet dhe duke reduktuar numrin e bashkive në 39 deri në 47 të tilla. Varianti me 39 bashki mbështetej nga socialistët në atë kohë, por ai u kundërshtua nga Partia Demokratike, që bojkotoi gjithë procesin, ndërsa vetë PS nuk i kishte numrat për ta miratuar pa mbështetjen LSI-së, në atë kohë aleate me të. Rruga e mesme që u gjet për të marrë edhe mbështetjen e LSI-së në Kuvend ishte rritja e numrit të bashkive në 61 të tilla. 10 vite më vonë, Rama hedh për diskutim një tjetër reformë për ndarjen territoriale, që nëse realizohet sipas variantit me ndarjen e vendit në 3 ose 4 rajone, prek direkt edhe Kodin Zgjedhor dhe ndarjen e mandateve në Kuvend, që deri më tani janë bërë mbi bazën e ndarjes së vendit në 12 qarqe.