Ulërima dhe grushta, një zënkë që është shndërruar në sherr të vërtetë dhe gjithcka ka ndodhur në kabinën e pilotumit ndërkohë që avioni ishte në mes të fluturimit dhe pasagjerët në bord. Një skenar ky aspak i zakonshëm. Ngjarja ka ndodhur në një fluturim të Air France, dhe sipas mediave lokale, pilotët kanë filluar të grinden për motive të kota. Menjëherë pas nisjes së avionit në fluturim, mësohet se një nga pilotët ka qëlluar me shuplakë tjetrin pas një diskutimi. Por nga shuplakat është kaluar më pas me grushte e madje edhe me valixhet e pilotëve. Ato që kanë zgjidhur situatën e tensionuar kanë qenë asistentet e fluturimit që kanë dëgjuar sherrin në kabinë dhe kanë ndërhyrë për ti ndarë. Pasi u ndal sherri, një pjesëtar i ekuipazhit është detyruar të kalojë gjithë pjesën e mbetur të fluturimit i ulur pas pilotëve, për shkak të frikës se situata do të mund të degjenronte edhe një herë tjetër. Kompania franceze menjëherë ka reaguar ndaj episodit dhe e ka quajtur rastin një sjellje krejtësisht të papërshtatshme. Më pas ka konfirmuar se ka patur një mosmarrëveshje që është përshkallëzuar por gjithcka ka zgjatur për pak caste dhe në asnjë moment nuk është cënuar siguria e pasagjerëve. Dy pilotët janë pezulluar nga puna dhe ka nisur një hetim tashmë, në përfundim të të cilit do të merren edhe masat e duhura.