Dy kroçierat e para kanë mbërritur këtë të mërkurë në Portin e Durrësit duke celur zyrtarisht sezonin turistik. Anijet turistike “Monet” dhe “La belle de l’Adriatique”, vizitore të njohura të brigjeve shqiptare, kanë sjellë dhjetëra turistë nga vende të ndryshme, të cilët po vizitojnë qytetin dhe destinacionet përreth. Gazetarja e Top Channel Vali Qyrfyçi raporton se kroçera “La belle de l’Adriatique”, me flamur belg, mbërriti rreth mesditës me 95 pasagjerë dhe 49 anëtarë ekuipazhi. Anija turistike erdhi nga porti i Igumenicës në Greqi dhe, pas një qëndrimi njëditor në Durrës do të vijojë itinerarin drejt Dubrovnikut, në Kroaci. Ndërkohë anija turistike “MONET”, që lundron nën flamurin e Saint Vincent & Grenadines, mbërriti mëngjesin e kësaj të mërkure nga Kotorri dhe do të vijojë më tej drejt Vlorës.