Dy kometa të gjelbra të shndritshme po përshkojnë qiellin dhe janë të dukshme në Hemisferën Veriore. Të dyja vijnë nga skajet e jashtme të sistemit tonë diellor, ndoshta nga ajo që njihet si Reja e Oortit, shumë përtej Plutonit. Kometa Lemmon do të ketë kontaktin e saj më të afërt me Tokën të martën ose rreth saj. Lëmshi tjetër kozmik, Kometa SËAN, duhet të ketë momentin e saj më të afërt me Tokën të hënën, por po i largohet diellit dhe ka të ngjarë të zbehet me kalimin e ditëve. Të dallosh dy kometa njëkohësisht pa pajisje speciale është "e rrallë, por jo e pashembullt", thonë ekspertët. Për t’i parë ato duhet të dilet jashtë menjëherë pas perëndimit të diellit dhe të shikohet qielli. Kometa Lemmon do të jetë shumë afër horizontit, në drejtim të veriut ndërsa kometa SËAN duhet kërkuar në jugperëndim. Kometat mund të jenë të dukshme me dylbi deri në fund të muajit, por ekspertët nuk janë ende të sigurt se sa të ndritshme do të mbeten ato. Kometat janë mbetje të ngrira nga formimi i sistemit diellor miliarda vjet më parë. Ato nxehen ndërsa lëvizin drejt diellit, duke krijuar kështu bishtat e tyre karakteristikë. Kometa Lemmon u zbulua në janar nga një teleskop që kërkonte asteroidë në qiellin e natës. Kometa SËAN u zbulua në shtator nga një astronom amator duke përdorur foto nga një anije kozmike e operuar nga NASA dhe Agjencia Evropiane e Hapësirës. Kometat janë të gjelbra për shkak të gazrave që rrjedhin nga sipërfaqet e tyre. Nga Toka, ato do të duken si njolla gri dhe të turbullta.