Kryeministrja italiane Giorgia Meloni dhe homologja e saj daneze, socialdemokratja Mette Frederiksen, kanë publikuar një mesazh të përbashkët për të ardhmen e Evropës, duke kërkuar politika më të ashpra ndaj emigracionit të paligjshëm dhe forcim të sigurisë. “Nuk pranojmë emigracion të pakontrolluar drejt Evropës dhe kemi promovuar një politikë të rreptë migracioni, si në vendet tona, ashtu edhe në nivel evropian”, shkruajnë dy kryeministret. Ato shtuan se emigracioni i paligjshëm ka sjellë pasoja negative për shoqëritë evropiane, duke përmendur rritjen e kriminalitetit, presionin mbi shërbimet publike dhe rënien e besimit të qytetarëve. Meloni dhe Frederiksen e cilësojnë situatën veçanërisht shqetësuese në rastet kur emigrantë pa të drejtë qëndrimi përfshihen në krime të dhunshme, trafik droge apo akte të dhunës seksuale. Sipas tyre, qytetarët evropianë presin veprime konkrete nga liderët politikë përballë këtyre problematikave.