Dy avionë pasagjerësh janë përplasur në një aeroport në Japoni, pak javë pasi pesë persona humbën jetën në një aksident të ngjashëm. Avionët e Korean Air dhe Chathay Pacific, u përplasën me njëri tjetrin në aeroportin Neë Chitose në Hokkaido. Avioni i Cathay Pacifik ishte i parkuar në pistë kur u godit nga avioni i korean air në lëvizje, tha departamenti i zjarrfikësve. Cathay Pacific konfirmoi se avioni ishte i ndalur në kohën e aksidentit dhe nuk kishte pasagjerë apo pjesëtarë të ekuipazhit në bord. Përfaqësuesi i kompanisë ajrore tha se fluturimi CX583 nga Sapporo në Hong Kong, u anulua dhe pasagjerët ishin zhvendosur në një tjetër fluturim. Pamjet treguan një vrimë të madhe të hapur nën krahun e avionit të Cathay Pacific ku avioni tjetër u përplas duke thyer krahun e tij. Avioni i Korean Air po përgatitej të nisej në fluturim kur krahu i tij i majtë u përplas me avionin e parkuar pranë tij. Zyrtarët e Korean Air thanë se incidenti kishte ndodhur kur një makinë rimorkiuese që po zhvendoste avionin para dhe prapa, para nisjes në fluturim, rrëshqiti për shkak të borës në pistë. Kishte 289 pasagjerë në bordin e avionit të Korean Air në atë moment por nuk është regjistruar asnjë lëndim. Ndërkohë, të paktën 46 fluturime të tjera u anuluan nga ky aeroport gjatë ditës për shkak të kushteve të këqia të motit.