Duke veçuar guvernatorin e Floridës, si armikun e tij më të madh brenda Partisë Republikane, ish-presidenti Donald Trump është përpjekur t’i tregojë vendin aij, shpesh duke përmendur rolin që luajti mbështetja e tij, për ligjvënësin relativisht të panjohur të Floridës, për t’u zgjedhur si guvernator i një prej shteteve më të mëdha të Amerikës. Nga ana e tij, DeSantis ndonëse prej kohësh ka vlerësuar dhe ndjekur stilin e republikanit Donald Trump, ka refuzuar të lërë mënjanë ambicjet e tij për Shtëpinë e Bardhë, ndërsa ish-presidenti përgatitet të shpallë kandidaturën për postin që humbi dy vjet më parë. Një shenjë e qartë tensioni mes tyre ishte edhe mbajtja e dy tubimeve të veçanta në Florida gjatë ditëve të fundit para zgjedhjeve për në Kongres. Gjatë tubimit të tij, Trump përdori një pseudonim tallës për guvernatorin DeSantis, duke e quajtur atë ‘Ron DeSanctimonious’ Rivaliteti mes dy figurave më të njohura të Partisë Republikane po shkon drejt një faze të re, më shpërthyese, pas rezultateve të dobëta të atyre që priteshin të ishin zgjedhje të suksesshme për republikanët. DeSantis vetë, arriti një fitore të thellë në zgjedhje, dhe po shihet gjithnjë e më shumë si udhëheqësi i ardhshëm i republikanëve. Nga ana tjetër Trump, kandidatët e preferuar të të cilit humbën në Pensilvani dhe Arizona, po fajësohet gjerësisht për humbjet e republikanëve. Kjo situatë po e vë atë në pozitën më të dobët, që nga trazirat e 6 janarit të vitit 2021 në Kapitol.