Kryeministri Edi Rama iu rikthye komenteve në lidhje me kërkesën e dy shoqatave të gjyqtarëve për rritje page. rama - Kërkojnë 1800 euro rritje për gjyqtarin e Shkallës së Parë, 2000 euro rritje për gjyqtarin e Apelit dhe 3000 euro rritje për gjykatësit e SPAK, BKH. SPAK nuk i është bashkuar kësaj iniciative absurde dhe kjo i bën respekt natyrisht. Këtu jemi, jemi në një situatë ku gjykatësit duhet të imponohen mbi parlamentin, mbi qeverinë, mbi dy pushtetet e tjera, duan të marrin rroga sipas mendimit të tyre. Duke i konsideruar të paqëna argumentimet e gjyqtarëve për rritjen e pagave në Gjykatën Kushtetuese, Rama shpreson që kjo e fundit do të rrëzojë kërkesën e tyre. Sinkron rama - "Unë shpresoj shumë që Gjykata Kushtetuese mos t’ia lërë këtë njollë të madhe turpi Shqipërisë dhe mos të na detyrojë të kërkojmë ilaçe të tjera. Kush është i interesuar, le të marrë regjistrimin e asaj seance, të shohë çfarë bëhet dhe do kuptojë shumë mire sa absurde është kjo histori, me gjykatësit që duan t’i rrisin vetes pagat, vetë zot, vetë shkop”. Kreu i Qeverisë deklaroi se gjyqtarët në Shqipëri kanë pagat dy herë më të larta se gjyqtarët në Mal të Zi dhe Maqedoninë e Veriut dhe më të larta edhe se gjyqtarët në Greqi, që është edhe vendi i Bashkimit Europian.