Rexhep Ademi, një qytetar që protestoi disa ditë para godinës së SPAK, duke kërkuar drejtësi për vrasjet dhe dhunën që i janë bërë anëtarëve të familjes së tij është dhunuar nga dy persona në Kavajë. Ai pretendon se po i vjedhin tokën në Kavajë për të ndërtuar. Ademi u bë i njohur pasi protestoi për ditë të tëra para SPAK, duke mbajtur në duar pankarta me emrat e familjarëve të tij të ndjerë.. “I vdekur që i vdekur jam… Nënën ma vranë, dajën ma vranë, pronat i kam vuajtur, shtëpinë duan të ma prishin. Tani, do të bëjmë konflikt dhe ose do hyjmë në burg, ose do vritemi. Më mirë vdes këtu. Do bëj grevë këtu në rrugë, deri në vetëflijim”, deklaronte ai gjatë protestës simbolike para SPAK. Ademi ka kërkuar që drejtësia të hetojë disa raste të rënda, përfshirë vrasjen e Selman Ismailit dhe tentativën e vrasjes së Sheko Qerim Ademit. Sipas tij, vrasjet dhe tentativat për vrasje të familjarëve të tij janë të lidhura me grabitjen e pronave të tyre nga individë të caktuar. Ademi akuzon se këto vrasje janë ende të papërfunduara në hetime dhe për disa prej tyre, si rasti i familjes Qerim Rifat Ismaili, është përdorur si justifikim një vetëvrasje e dyshimtë.